Erasmus+ viðurkenning
Stóru-Vogaskóli hlýtur nafnbótina eTwinning skóli ársins
Stóru-Vogaskóli hefur verið útnefndur eTwinning skóli ársins á Íslandi, en skólinn hefur verið þátttakandi í verkefninu í tuttugu ár. Þessi viðurkenning er mikilvægur áfangi í sögu skólans og staðfestir framúrskarandi árangur í alþjóðlegu samstarfi.
Í ár er skólinn í virku samstarfi við tvo evrópska skóla, Istituto Comprensivo Marconi Battipaglia á Ítalíu og Collège Jean Mounès í Pornic í Frakklandi. Tuttugu nemendur úr 9. og 10. bekk hafa þegar heimsótt samstarfsskólana og í maí er von á tuttugu nemendum frá þessum skólum í heimsókn í Stóru-Vogaskóla. Verkefnið leggur sérstaka áherslu á Reykjanes GeoPark, ábyrga ferðamennsku og sjálfbærni. Vakinn er áhugi nemenda á umhverfisvernd og hafa þeir öðlast dýpri skilning á mikilvægi þess að vernda náttúruna og draga úr plastnotkun. Þetta samræmist vel markmiðum aðalnámskrár um að efla sjálfstæða hugsun, samskiptahæfni og alþjóðavitund.
eTwinning hefur gjörbreytt kennsluháttum í skólanum og opnað nemendum nýjar víddir í námi. Nemendur eiga nú í reglulegum samskiptum við jafnaldra sína í öðrum löndum, sem hefur ekki aðeins bætt enskukunnáttu þeirra heldur einnig aukið skilning þeirra á ólíkum menningarheimum. Athyglisvert er að sjá hvernig nemendur sýna aukið frumkvæði og áhuga þegar verkefni þeirra verða sýnileg nemendum í öðrum löndum.
Árangur verkefnisins hefur haft jákvæð áhrif á alla skólamenningu Stóru-Vogaskóla. Fleiri kennarar sýna áhuga á þátttöku og samvinna starfsfólks hefur eflst til muna. Foreldrar eru einnig afar jákvæðir gagnvart verkefninu og sumar fjölskyldur hafa jafnvel heimsótt vinaskólana að eigin frumkvæði.
Með þessari viðurkenningu sem eTwinning skóli ársins, staðfestist að Stóru-Vogaskóli er í fararbroddi þegar kemur að alþjóðlegu samstarfi og nýsköpun í kennsluháttum. Verkefnið hefur ekki aðeins bætt tungumálakunnáttu nemenda heldur einnig myndað tengsl við nemendur í öðrum löndum, auk þess sem víðsýni þeirra og skilningur á mikilvægi sjálfbærni og umhverfisverndar í alþjóðlegu samhengi hefur aukist.
